17 mei 2007

Fuglasöngur

Fuglar eru, ásamt músum og músútlítandi dýrum, í miklu uppáhaldi hjá mér. Ég hef aldrei fyrr búið í jafnmiklu návígi við þessar fjöðruðu skepnur, svo undanfarna mánuði hef ég heldur betur getað fylgst með þeirra mjög skemmtilega og margbreytilega hátterni; og ég fæ ekki betur séð en að fuglar séu um margt líkir mannfólki í háttum. Rétt eins og gildir um fólk, að minnsta kosti fólk sem fylgir óskráðum mannasiðalögum, klára krákurnar og skjóarnir* ekki það sem skilið er eftir úti á svölum handa þeim. Nei, þeir skilja eftir einn bita! Þetta gera þeir meira að segja ef við gefum þeim rúsínur, sem þeir eru sólgnir í.

Svo er mikill munur á krákunum og skjóunum; krákurnar eru tiltölulega óhræddar við mannfólk (en hafa þó mjög greinilega augun hjá sér), skjóarnir hins vegar staldra stutt við og spyrna sér fram af svölunum liggur við áður en þeir eru lentir. Þó fer það að nokkru leyti eftir því hvað lagt er niður fyrir þá, því báðar tegundir virðast fórna sér meira fyrir til dæmis rúsínur og hrísgrjón heldur en árbítsköku, brauðmola og kexkökur.

Þeirra erkióvinur er hins vegar kötturinn á hæðinni fyrir ofan, sem einnig venur komur sínar á svalirnar hjá mér ... en hann fær reyndar sömuleiðis góða meðferð, hefur bragðað íslenskan harðfisk (lítur þó ekki við roðinu), soðinn ufsa frá Alaska, hollenska mjólk, nautahakk í framandi sósu og stelst reyndar líka í hrísgrjón sem ætluð eru fuglunum.

Svo eru hér hænur á vappi í skógarþykkninu umhverfis húsin (sem kunna vel að meta árbítsköku) og íkornar í trjánum.

En, það sem ég ætlaði eiginlega að segja var nú bara það, að ég er handviss um að fjölmargir tónlistarmenn hafi fengið innblástur af því að hlýða (viljugir eða óviljugir) á fuglasöng. Ég heyri söngfuglana sífellt syngja línur sem ég kannast við úr lögum — nema því sé hreinlega öfugt farið!

Hvað er þetta vinsæla lag hér til dæmis annað en daðrandi karldúfa?




* Mynd breytt 19.05.07 (hollenskur skjór)

14 mei 2007

Oggupínuponsu

Jæja. Nú má segja að sannarlega sé tími til kominn að ég skrifi eitthvað hér. Fyrst:

Það var gaman í Tékklandi. Myndir hér (3 síður minnir mig, ca 50 myndir).

Pápi heiðraði okkur Jolöndu með nærveru sinni í fyrradag, laugardag. Það var líka skemmtilegt. Við röltuðum um Utrecht, börðumst fyrripart dags við veðurguðina en nutum veðurblíðu seinnipart og fram eftir kvöldi. Fórum (í blíðu) í dómkirkjuna og upp í dómkirkjuturninn, fengum okkur að borða, og ýmislegt fleira.

Já.

Þessa vikuna er ég ekki í tímum (vegna forfalls kennara og byggingar verða lokaðar á föstudaginn) en ég þarf eftir sem áður að lesa og vinna verkefni. Hins vegar ætlum við Jolanda í tívolí, sem ekki má þó svo kallast, á föstudaginn með nokkrum vinum hennar. Það verður ábyggilega spennandi. Mér skilst að það eigi að draga mig í Hollendinginn fljúgandi, en það verður þungur dráttur. Ég finn mér vonandi passlega rólega hringekju við mitt hæfi í staðinn.

Jájá.

Ég hef tengt gagnavarpssímtæki („rödd yfir IP“-síma eins og hann nefnist á einhverjum öðrum málum) sem einhverjir gætu séð hag í að hringja í, í stað gemsans. Þetta fylgdi herberginu mínu en ég þorði ekki að stinga þessu skrapatóli í samband. Sennilega gagnast þetta helst þeim sem búa eða eru staddir hérna í Hollandi og vilja ná í mig (líklega er líka ódýrara að hringja í þetta númer frá Íslandi, ef einhver kærir sig um).

Jæja, númerin eru þá:

Heimasími (Zeist, fastlína): +31 307 113884
GSM: +31 648 217180

(Sennilega er ókeypis að tala við fastlínunúmerið ef hringt er úr öðrum gagnavarpssíma, að minnsta kosti gildir það um þennan, óháð því hvert hringt er, skilst mér.)

01 mei 2007

Drottningardagur

Jæja, ég hyllti drottninguna í gær ásamt nokkrum húsfélögum og vinum þeirra í Trekt. Drottningin lét reyndar ekki sjá sig þar. Hún þvælist um landið ár hvert á þessum appelsínugula afmælisdegi móður sinnar, þegnum sínum til mikillar ánægju. Fullt af fólki, hávaðasöm tón„list“, skemmtilegir markaðir sem Hollendingar nefna draslmarkaði. Þeir eru skör lægra sýnist mér en flóamarkaðir, með sannkallað drasl á boðstólum: úr sér setna hnakka á hjól, sundurryðgaðar luktir, haugdrullug borðföng, ryðgaðar þjalir og hamrar; en þó líka talsvert af bókum, geisla- og mynddiskum, spólum og snældum, og ýmsu matarkyns sem ekkert var mjög listugt (en sumt sannarlega þjóðlegt og vel lyktandi). Þetta er jú mestallt eitthvert drasl sem fólk er að losa sig við úr geymslum (ekki þó maturinn, held ég!), og allt selt fyrir slikk. Þarna sá maður alls kyns fólk og það var skondið að sjá furðulega stafsett skilti frá Tyrkjum og annarra þjóða lýðum (ég segi ekki óþjóðalýðum). Ég keypti mér þarna næstum Erik the Viking á DVD á um 150 krónur, en víkingur hússins varð fyrri til.

Eftir um þriggja klukkustunda ráp um götur borgarinnar var ég samt kominn með svolitla „menningar“þreytu, svo við Jolanda drógum okkur í hlé. Það er reglulega fallegt að hjóla á milli Trektar og Zeistar í góðu veðri, og nú eru lömbin orðin stælt og tiltölulega gæf. Góða veðrið mætti samt fara að draga sig í hlé, hér hefur ekki dropi fallið úr lofti í mánuð og bændur orðnir pirraðir. Ég er ekki frá því að mig sé farið að langa í svolitla rigningu og kulda líka.

Það koma myndir á Flickr seinna í dag; frá Keukenhof (sem áður hafði verið lofað), Blijdorp og smá frá drottningardegi í gær.

26 april 2007

Haförn í beinni

Hér í Niðurlöndum er talsvert af vefmyndavélum sem sýna alls kyns athafnir. Ég rambaði á skemmtilega vél sem sýnir arnarhreiður í beinni útsendingu — mjög skemmtilegt (sjá hér).

Annars er allt gott að frétta. Ný önn hafin; þeirri fyrri lauk að mestu ágætlega, með eina góða einkunn og eina ... ekki — svona eins og gengur. Ég sendi bráðlega inn myndir úr ferðalögum síðustu viku, sem var kennsluhlé (ótrúlegt en satt er kennsluhlésvikan eða de onderwijsvrije week sannarlega kennslufrí; og stranglega bannað að setja nemendum fyrir í þeim. FRÍ = FRÍ).

16 april 2007

Norðurferð

Jæja, við komum heim úr helgarferð seint í gærkvöldi og það var rosalega skemmtilegt. Við fórum 6 saman, þrennt af hvoru kyni, yfir um til Texel með ferju í kringum hálfátta á föstudagskvöld og áttum þar rólega kvöldstund. Veðurspáin fyrir helgina var alveg ótrúleg, um og yfir 25°C hiti alla helgina -- og svo heitt var það (og sennilega heitara því þegar við fórum heim á sunnudagskvöldið og sólin löngu sest var hitinn enn 24°C...).




Á laugardaginn leigðum við hjól og fórum í einhvers konar sædýragarð, þar sáum við seli, fugla, fiska, krabba, froska og önnur vatna- og sjávardýr af ýmsu tagi. Mjög skemmtilegt. Svo hjóluðum við meira um eyjuna, í bæinn De Koog þar sem við kíktum í nokkrar búðir og fórum svo á ströndina. Bæði í De Koog og á ströndinni var talsvert margt fólk en það var þó vel hægt að vappa um ströndina. Sérstakt að sjá svona alltöðruvísi sand og svoleiðis. Á heimleiðinni fórum við í stórmarkað og keyptum í matinn, ég fékk mér líka einhverskonar sólhatt og baðskó því hitinn var að drepa mig. Svo fórum við heim og borðuðum. Um kvöldið hjóluðum við aftur á ströndina til þess að fylgjast með sólsetrinu, sátum svo á mannlausri ströndinni í myrkrinu með snakk og drykki. Eftir það tvístraðist hópurinn, annar helmingurinn fór í bæinn að skemmta sér að íslenskum sið, hinn hópurinn (með Íslendinginn innanborðs) fór heim að spjalla og snemma í háttinn því að hann ætlaði snemma á fætur daginn eftir og hjóla meira um eyjuna.

Snemma morguninn eftir fór reglusami hópurinn út, keypti kort af eyjunni og hjólaði norður eftir eyjunni og að áhugaverðum stöðum. Hitinn var næsta óbærilegur á köflum (ég auðvitað sólbrann þrátt fyrir að hafa atað mig allan út í sólolíu), þannig að við sóttum í leiðir í gegnum skógarþykkni frekar en annað, en þess var yfirleitt ekki kostur. Á leið okkar eftir ströndinni austan megin var mikið af kindum og nýfæddum lömbum, mjög krúttlegum. Þessi eyja er reyndar þekkt fyrir kindamergð, og gengur hálfpartinn undir nafninu „fjárey" þess vegna. Merkilegt nokk sá ég bara eina vindmyllu á eyjunni (óvenjulegt), en í staðinn komu gríðarstórir háhollenskir túlípanaakrar í öllum regnbogans litum (og fleiri litum til). Síðdegis, að sextíu funheitum kílometrum liðnum, fórum við svo heim að baka hollenskar pönnukökur (með eplum; nautahakki; osti; súkkulaðihöglum (hagelslag); sírópi; flórsykri ...). Um áttaleytið tókum við svo ferjuna heim og vorum komin til 's-Gravendeel um hálfellefu á sunnudagskvöld.

En, á föstudaginn litum við Jolanda líka aðeins á Amsterdam ... hvílík og önnur eins borg! Ha, hjálpi mér.

Má bjóða einhverjum sleikjó?


Ég fékk þvílíkt menningarsjokk að ég var næstum allan daginn að ná mér. Eins og þið getið fullvissað ykkur um með sjónrænum sönnunargögnum Flickr-rásinni var þarna ýmislegt misjafnt, ... þarna á ósköp venjulegum blómagötumarkaði var hægt að kaupa sér kannabisplöntur, kannabisfræ („Grow your own kannabis, starter kit“), kannabissleikjó, kannabisskífur, kannabiste, sveppate og ég veit ekki hvað og hvað; eins og ekkert væri sjálfsagðara. Ég sá líka nokkur málverk, en það má kannski segja að þessi ósköp hafi svolítið eyðilaggt stemninguna, sem og lyktin.

Það er gott að búa í Hollandi ... hm!

08 april 2007

Gleðilega páska!

Í gær brugðum við Jolanda og Íslandsvinurinn Christian okkur í smá „lautarferð“ til Trektar, með nesti og tilheyrandi. Ég tók auðvitað fullt af myndum (les: 171) og geta áhugasamir kíkt á Flickr-rásina mína til að berja þær augum (ég bendi reyndar óáhugasömum á að gera slíkt hið sama). Mér finnst frábært hvað gróðurinn er farinn að taka mikið við sér.

(En mikið vildi ég að hér yrði sett á algert reykingabann.)

05 april 2007

Ég ...

... er ekki (lengur) gefinn fyrir generatífa málfræði (»»)

... er 17,8 ára gamall að líffræðilegum aldri (»»)

... er 79% kristinn (ekki öll vitleysan eins) (»»)

... er í víðlesnu hérlendu dagblaði (sjá einnig í gagnavarpinu! 04.05.2007) í viðtali vegna erlends húsfólks, með flennistórri mynd og beinum tilvitnunum (en rangnefndur Heimir Freyr Vitarsson, af hlægilegum ástæðum) (»»)

... er farinn að kunna mjög vel við mig hérna.

28 maart 2007

Jæja, það er sannarlega tími til kominn að ég skrifi eitthvað á þessa bloggrás.

Ballið í Den Bosch var mjög áhugavert. Áhugavert segi ég, jú, skemmtilegt líka — svolítið spes. Við fórum þangað þrjú og vorum komin mjög tímanlega. Svona nærri klukkan níu var byrjað að dansa, fyrst allir saman í hóp með leiðsögn tveggja hæfileikaríkra dansara. Auðvitað gekk mér hræðilega að ná sporunum, handahreyfingunum, sveiflum, víxlingum, skiptingum og að halda svo þessu öllu í takt við tónlistina. Ég segi það og skrifa, mér er músík ekki í blóð borin. Ég sé bara engin tengsl milli tónlistar og þess að þurfa, vilja eða geta hreyft sig í „takt“ við hana. Ég get kannski hreyft hendur í „takt“ við einhverja dynki sem ég heyri, en ef ég á að fara að hreyfa fætur með, og ekki líta út eins og ég sé að einbeita mér að því að skrifa óundirbúna tímaritgerð ... það er bara ekki hægt. Jæja. Þessi partur gekk þó tiltölulega vel fyrir sig. Eftir langa, sveitta og þreytandi danslotu var örlítið skipt um gír og við látin dansa leiðbeiningarlaust. Það þótti mér svo skelfilegt að ég flúði í sófa hæfilega fjarri dansgólfinu. Gerði, ef ég man rétt, tvær tilraunir til þess að fara aftur inn á dansgólfið en ég forðaði mér þaðan örskömmu síðar, enda hafði ég ekki hugmynd um hvað ég ætti að gera.

En það er eitt, stór munur frá öllu því sem ég hef séð á Íslandi. Þarna var fólk aðallega á aldrinum þetta 18-25 ára, þó talsverður slatti af eldra fólki líka, 40-50 og stöku eldra ... en ekkert af þessu fólki var drukkið, né að drekka áfengi. Áfengi var þó selt þarna, meira að segja við vægu verði. Þetta finnst mér aðdáunarvert, en um leið hálfpartinn óskiljanlegt. Heilbrigð skemmtanamenning.

Héðan er annars allt gott að frétta, veðrið alveg yndislegt (það er reyndar spáð þrumum og eldingum á morgun) og ég hlakka mikið til þess að komast í frí og skoða mig betur um hérna. Mér gengur svona la-la með að ná málinu, ég skil meira og meira en mér finnst erfitt að tjá mig. Sumum finnst alveg óhemju fyndið að hlusta á framburðinn hjá mér, til dæmis hvernig ég skýt ósjálfrátt inn T í orð með SL, til dæmis sla 'kál' sem ég (og allir Íslendingar myndu) bera fram „sTla“. Ga maar sTlapen in je sTlaapkamer (þ.e. 'farðu bara að sofa í svefnherberginu þínu').

Jæja.

19 maart 2007

Vetrarhörkur

Jæja! Loksins þegar vorið hafði hafið innreið sína dundi hér á hið mesta illviðri í gær, með grenjandi rigningu og hagléljum á víxl, auk þrumna og flennistórra eldinga í um 600 metra fjarlægð. Í dag var veðrið talsvert dannaðra, og um hádegisbil hrutu hvorki meira né minna en hundslappir makindalega niður af himni. Ég spurði að sjálfsögðu hvað svona hundslappadrífa nefndist á hollensku en auðvitað eru hér engin sérstök orð um það höfð, bara blautur snjór, um 5 sentímetrar í þvermál, fallandi af himni! Jæja.

Mér þótti skemmtilegt að þetta skyldi endilega sjást í miðjum merkingafræðitíma, þar sem við vorum einmitt að ræða um ýmis fyrirbrigði sem ekki eru til orð yfir í tungumálum. Til dæmis er inni í myndinni að tungumál hafi ekki orð yfir nema 3 liti (sem eru þá svartur, hvítur og rauður, ekki fyrir tilviljun). Skemmtilegt íslenskt dæmi er liturinn „appelsínugulur“ sem engin ástæða var áðurfyrr að nefna og ekkert orð þá til yfir (enda sennilega lítið um appelsínur); þó var — og er — auðvitað hægt að lýsa honum sem „rauðgulum“.

Getur eitthvað verið fölrautt? Eða er eitthvað sem er fölrautt bara sjálfkrafa bleikt? Um þetta eru víst deildar meiningar. Ég þykist vel geta ímyndað mér að eitthvað væri fölrautt og að ég gæti haft slíkt orð um svoútlítandi hlut. (Með gamansamri einföldum gæti ég kannski lýst minni túlkun á þessum litum svona: þegar rauður er orðinn það ljós/fölur að hann er ekki lengur fallegur, þá nefnist hann bleikur.)

Jájá, héðan er allt ágætt að frétta. Ég á orðið í stórkostlegu basli með að tala ensku (sem er góðs viti!) því hollenskur orðaforði og hollensk málfræði treður sér inn í hartnær hverja setningu. Þetta er mér sérstaklega erfitt ef ég sé til dæmis tölur skrifaðar með arabískum tölustöfum, og tönnlaðist til dæmis sífellt á hollensku tölunum, sem og hikorðum og öðrum sjálfkrafa viðbragðsorðum í fyrirlestri í merkingarfræði í síðustu viku. Þetta fer bara versnandi, Guði sé lof.

Á næstunni þarf ég að komast langt með að berja saman tvær meðalstórar ritgerðir um efni sem ég hef varla hundsvit á, þreyta (heima)próf um þarnæstu helgi sem ég mun svo sannarlega skríða á (ef ég næ þá svo langt) enda hefur kennarinn þegar lýst því yfir að hann eigi sjálfur í basli með að leysa það innan gefinna tímamarka. Sennilega er setningafræði ekki mín deild eftir allt saman, en það er þá ágætt að vita (þó) það.

Hins vegar stendur líka til að fara á einhvers slags (víkinga)danshátíð á föstudagskvöld í Den Bosch þar sem einn húsfélaga minna starfar sem víkingur. Einnig kemur til greina að fara á tónleika með færeysku hljómsveitinni Tý (eða segir maður núorðið bara með Týr? — þannig er það a.m.k. ábyggilega á færeysku) í Arnhem, en ég er svolítið smeykur við kannabisreykingarnar sem vafalaust sjást þar meira en ég sé nú þegar á götum úti.

Þar sem fólk hefur verið að spyrja um símanúmerið mitt endurtek ég það hér enn og aftur:

+31 648 217180
(hins vegar er meira vit í að nota Skype þar sem ég er á skrá, heimsinn)

Að lokum þetta: ég held að mér finnist ekki að Kennaraháskólinn og Háskóli Íslands ættu að ganga í eina sæng. Eiginlega finnst mér það uggvænlegt ef ég hugsa til nokkurra kennaraháskólanemenda sem ég vann í námunda við á síðasta skólamisseri. Mér sýnist þeir vera í námi í allt öðrum tilgangi en gengur og gerist innan veggja Háskólans. (Hitt er svo annað mál að e.t.v. væri ég betur geymdur í Kennaraháskólanum.)

13 maart 2007

Vorboðar

Jæja, nú er náttúran svo sannarlega farin að taka við sér, krókusar spretta upp eins og gorkúlur (þær hef ég reyndar ekki séð hér), og páskaliljur og fífilsafbrigði, ásamt ýmsum öðru sem ég þekki ekki, og sólin skín eldheit eins og um sumar. Í gær var ég alveg að leka niður í Trekt vegna hita, búinn að troða því sem hægt var af spjörum ofan í skólatöskuna. Í morgun fengum við húsfólkið okkur morgunmat úti á eldhússsvölum og ég sat svo í stuttbuxum einum fata úti á herbergissvölunum að (reyna að) lesa. Og það er mars! Niðurlendingarnir virðast þó vera eitthvað kulvísari en ég því mér sýndist fólk ganga um kappklætt í götunni þó það væru rúmar 15°C gráður í forsælu, heiðskýrt og næsta vindlaust.

Til sönnunar því að vorið hefur hafið hér innreið sína er hér mynd af krókusum sem ég tók í Trekt í gær (sjá stærri gerðir og fleiri myndir á Flickr-rásinni):




Ný myndaalbúm á Flickr: Dordrecht (7) og Einn sólríkan vetrardag (6)