18 december 2006

Framtíðarheimili mitt

Mér hafa borist vísbendingar um mínar framtíðar-vistarverur frá SSHU (Stichting Sociale Huisvesting Utrecht), sem er einhvers konar Félagsstofnun Stúdenta / Stúdentagarðar.



Stúdentaíbúðir í Zeist (15 mín. frá miðbæ Trektar).
Að líkindum er herbergið mitt fyrir miðju þessarar myndar.1



Afar óíslenskt útsýni.1


En skemmtilegt og gezelligt að sjá.1


Þetta herbergi mun vera laust og skal verða mitt.

1Myndir teknar af gagnavarpsrás hverfisins; sjá nánar, http://www.warande.net

04 december 2006

Undur ...

... og stórmerki! Nú í fyrsta sinn á skólagöngu minni
er ég all-ánægður með öll námskeið sem ég vel á skólamisseri. Mig langar endilega að deila með ykkur ánægju minni með því að útlista þau hér, lauslega:

3. blokk: ca. febrúar-apríl

IVT-SEMANTIC STRUCTURES (200400801, 7,5 ECTS),
þ.e. við Instituut Vreemde Talen
Merkingafræði.

NED-VAN GB NAAR MINIMALISME (200400801, 7,5 ECTS),
þ.e. við Instituut Nederlands
Setningafræði.

4. blokk: ca. maí-júlí

NED-TUTORIAL LOGISCHE VORM (200500395, 7,5 ECTS),
þ.e. við Instituut Nederlands
Enn erfiðari setningafræði!

BILINGUAL LANGUAGE ACQUISITION (200400189, 7,5 ECTS),
þ.e. við Instituut Vreemde Talen
Tvítyngi - vonandi alvöru fræðilegt námskeið en ekki einhver froðufræði.

Ef ég hefði getað komið svo sem eins og einu handritanámskeiði þarna inn væri misserið fullkomið. Ég þarf að reyna að komast að því hvort fræðatröllið Andrea de Leeuw van Weenen kenni við Trektarháskóla. Mér skilst að gráðan hennar sé a.m.k. þaðan.

20 november 2006

Enginn farangur!

Ég hef kviðið því lengi að þurfa að burðast með allar bækurnar mínar til Niðurlanda. Á undanförnum vikum hef ég reynt að gera lista yfir þær bækur sem ég afsalút verð að taka með mér. Auðvitað verð ég að taka með mér Íslenskt mál í heild sinni (25 kg), einhverja útgáfu af Íslenskri orðabók (1-2 kg), Íslenska orðsifjabók (2,5 kg), Íslenska tungu (10 kg), Íslendingasögurnar (20 kg) og allt það (100! kg), ... og hvað með allar skáldsögurnar sem ég hef alltaf ætlað að lesa! Það er söksér að eiga þessar bækur og lesa þær aldrei - en geta lesið þær; en það er hörmulegt að vera mörgþúsund kílómetra fjarri þeim, og verða kannske að lesa þær í niðurlenskri þýðingu.

En viti menn: Niðurlönd eru siðmenntuð - þar eru nefnilega bókasöfn! Já, í Niðurlöndum keppast bókasöfnin greinilega við að viða að sér bókum, jafnvel ómerkilegustu útgefnu meistararitgerðir íslenskar má finna í þeim. Ég fann nefnilega þessa heimasíðu hér - en þetta mun vera niðurlenskur Gegnir (ég þurfti reyndar að brúka skólaaðgang til að komast inn í þennan „Gegni“ en hvað um það).

Þarna er allt!

Á bókasöfnunum hér finn ég ekki einu sinni merkilegar niðurlenskar bækur (nema Ríkið hafi komið eitthvað nærri útgáfu þeirra).